Облыстағы ең ірі полиция бөлінісінің жас қызметкерлері ант берді, деп хабарлайды Qyzyljarnews.kz тілшісі.
Жедел уәкілдер, тергеушілер, криминалистер, учаскелік, патрульдік, ювеналды және әкімшілік полицейлер тәулік бойы қылмысқа қарсы күрестің және қоғамдық құқықтық тәртіп пен жол қауіпсіздігін қамтамасыз етудің алдыңғы қатарында жүретіне белгілі. Биыл бұл құрылымда еңбек етуге жаңадан келген 6 жас маман ант берді.
Қалалық полиция басқармасы бастығының орынбасары Сағындық Теміреевтің айтуынша, жыл сайын өмірін құқық қорғау органдарымен байланыстырғысы келетіндердің қатары артуда.
– Полицияда қызмет ету – абыройлы міндет. Біз қатарымызға қоспас бұрын әр үміткерді сайдың тасындай іріктейміз. Олар медициналық, психикалық және физикалық тексерістен өтеді. Нәтижесінде лайықты азаматтарды жұмысқа аламыз, – дейді Сағындық Теміреев.
