Қырғызстан астанасы Бішкекте гір көтеруден Азия біріншілігі өтті. Сарықұрлықтың үздік спортшылары қатысқан додада ел намысын солтүстікқазақстандық Эрик Әлібаев қорғады, деп хабарлайды Qyzyljarnews.kz тілшісі.
Байрақты бәсекеде жерлесіміз ардагер-спортшылар санатында бағын сынап, үш бірдей алтын медальға қол жеткізді. Нәтижесінде Эрик Әлібаев Азия біріншілігінің бес дүркін чемпионы атанды.
– Мен Азия біріншілігінде гір тасын серіппе көтеру жаттығуында 178, жұлқа көтеруде 245 және ұзақ циклды жаттығуда 163 рет көтердім. Осылайша әр сында алтыннан алқа тағындым. Енді Ташкентте өтетін әлем чемпионатында ел құрамасы сапында өнер көрсетемін, – дейді Эрик Әлібаев.
Азия біріншілігіне 15 елдің спортшылары қатысты. Ұлттық құрама сапында 16 солтүстікқазақстандық гір көтеруші өнер көрсетті.
