Маусымның 7-сі мен 9-ы күндері аралығында облыс аумағында «Жасөспірім» жедел-алдын алу шарасы өтті. Тәртіп сақшылары түнгі көшелерде, көңіл көтеру орындарында және жастар жиналуы мүмкін жерлерде рейдтер жүргізді, деп хабарлайды Qyzyljarnews.kz тілшісі.
Кәмелетке толмағандардың заңды өкілдерінсіз сағат 23:00-ден бастап тұрғын үйден тыс жерде жүрулеріне болмайды. «Жасөспірім» акциясы аясында 3 күннің ішінде облыста осы талаптарды бұзған 125 адам анықталды. Барлық жағдайда ата-аналар әкімшілік жауапкершілікке тартылды. Сондай-ақ іс-шара кезінде із-түссіз жоғалған 17 жастағы жасөспірім табылды. Ажырасқан ата-ананың ұлы туысының үйінде тұрған, бірақ демалыстың алғашқы күндерінде үйден кетіп қалған. Уайымдаған әйел полицияға жүгінген.
— Аталған жасөспірім бұрын полицияның есебінде болмаған. Оны бірнеше тәулік бойы іздедік. Полицияның сыртқы қызметтері жұмылдырылды. Жасөспірімді 9 маусымға қараған түні жедел уәкілдер тауып алды. Ол қала көшелеріне шығып, қаңғыбастықпен айналысқан. Қызылжар ауданының Архангелка ауылындағы өмірлік қиын жағдайға тап болған балаларды қолдау орталығына орналастырылды. Оған қатысты материалдарды кәмелетке толмағандардың істері жөніндегі комиссияда қарау жоспарланып отыр, – дейді СҚО ПД жергілікті полиция қызметі басқармасының бастығы Айдын Байматов.
