Қызылжар ауданында Ақпарат және қоғамдық даму министрлігінің тапсырысы бойынша «Кеңес» жобасы іске қосылды. Оның аясында қиын өмірлік жағдайға тап болған азаматтарға көмек көрсетіледі, деп хабарлайды Qyzyljarnews.kz тілшісі.
Республикалық жобаны жүзеге асыру мақсатында «Молодеж за ЗОЖ» қоғамдық бірлестігі Қызылжар ауданында фронт-кеңсе ашты. Оған Бескөл, Прибрежное және Якорь ауылдарындағы еңбекке қабілетті жастағы тұрғындар жүгіне алады. «Бір терезе» қағидаты бойынша жұмыс істейтін кеңседе елді мекендердің тұрғындары заң және психологиялық тұрғыда көрсетілетін көмекке қол жеткізбек. Сонымен қатар, өмірлік қиын жағдайға тап болғандардың жас белсенділердің қолғабысы арқасында қайта кәсіби даярлықтан өтуіне мүмкіндіктері бар. Қысқа мерзімді курстар ішінде ауыл азаматтары білімдерін шыңдап, жаңа жұмыс орындарына орналаса алады.
Көмекке жүгінгендер арнайы курстарда шаштараз, веб-дизайнер, СММ-маманы және мобилограф сынды жаңа кәсіп түрлерін игере алады. Оқытудан мүгедектігі бар еңбекке қабілетті жастағы ауыл тұрғындары, мүмкіндігі шектеулі балаларды тәрбиелеп отырған ата-аналар, аз қамтылған, толық емес, көпбалалы отбасылардың мүшелері, сондай-ақ NEET жастар санатына кіретін азаматтар қатысады. Тың жоба бойынша 20-дан астам адамды оқыту жоспарланып отыр.
