Маусымның 18-і мен 22-сі күндері аралығында Астана қаласында «IQanat-2023» республикалық олимпиадасының ақтық сыны өтеді. Оған еліміздің облыстарынан 824 бала қатысады, оның 41-і – солтүстікқазақстандық өрендер, деп хабарлайды Qyzyljarnews.kz тілшісі.
Республикалық олимпиада 8-ші сынып оқушылары арасында ұйымдастырылып отыр. Өңір намысын өңірімізден 41 ауыл оқушысы қорғайды. Ауқымды офлайн олимпиаданы «IQanat» қоғамдық қоры ауыл балаларына сапалы білімге жол ашу мақсатында өткізуде. Соңғы 5 жылда білім бәйгесіне 160 мыңнан астам ауыл мектебінің тәрбиеленушісі қатысты.
Республикалық слёт аясында соңғы іріктеу кезеңі өтіп, 120 жеңімпаз «Iqanat» мектебіне тегін оқуға шақыру алады, ал қалған қатысушылар олимпиададан кейінгі білім беру бағдарламаларымен қамтылатын болады.
«Iqanat» олимпиадасы және қордың басқа да бағдарламалары мыңдаған ауыл балаларына ең жоғары технологиямен қамтамасыз етілген мектептердің бірі – «IQanat High School of Burabay» мектебіне түсіп білім алуға, үздік жоғары оқу орындарына түсуіне мүмкіндік береді.
