Имантау көлінің жағалауында орналасқан «Қарлығаш» демалыс орнында балаларға арналған «Ұлттық код – рухани болмыс кілті» атты аудандық өлкетану фестивалі өтті, деп хабарлайды Qyzyljarnews.kz тілшісі.
Фестиваль — қазақ халқының мәдени құндылықтарын, салт- дәстүрін, әдеп-ғұрпын, қолөнерін, зергерлік, атбегі өнерін насихаттау мақсатында ұйымдастырылды.
«Қарлығаш» демалыс орнында екі киіз үй тігіліп, қазан-ошақта балаларға ас дайындалды. Фестивальға 150 –ге жуық аудан мектептерінің оқушылары келді. Шараның ерекше әсер қалдырған сәттерінің бірі – балалардың ұлттық қолданбалы өнермен танысып, өз қолдарымен қыштан түрлі заттар жасап үйренуі, ұлттық тағамдардың жасалуын көріп, өз қолдарымен даярлауы болды.
Имантау ауылының тұрғыны Сұлтанбек Бибек балаларға ата-бабамыздан келе жатқан ұлттық сусынымыз қымыздың дәмін татқыза отырып, даярлау жолын түсіндіріп өтті.
