Биылғы жол құрылысы маусымында жолшылар А-16 «Жезқазған-Петропавл» күре жолының бірқатар учаскесін жөндеуге кірісті. Жөндеу жұмыстары Ақмола, Қостанай, Солтүстік Қазақстан және Ұлытау облыстарының аумағында жүргізіліп жатыр, деп хабарлайды Qyzyljarnews.kz тілшісі.
Күре жолдың Уәлиханов ауылынан Державинск қаласына дейінгі, Арқалық қаласынан Ақмола облысының шекарасына дейінгі, Сергеевка ауылынан Николаевка ауылына дейінгі, Ұлытау аудан орталығынан Арқалық қаласына қарай апаратын жол бөліктерін толық жөндеу көзделген.
Жөндеу жұмыстарымен қамтылған учаскелердің жалпы ұзындығы 150 шақырымды құрайды. Жұмысқа бес мердігер ұйым жұмылдырылды. Жөндеу жұмыстары бекітілген жоспарға сай жүзеге асуда.
Мәселен, Арқалық қаласынан Ақмола облысының шекарасына дейінгі жол аралығында жұмыстар аяқталуға жақын (Қостанай өңірі бойынша).
Жөндеу жұмыстары аясында мамандар жаңа асфальтбетон жабынын төсеп, жол жиегін нығайтады. Жолшылар қайта өңдеу әдісін қолдануда. 100-ге жуық арнайы техника мен 130-ға жуық маман жұмылдырылды.
«Жезқазған-Петропавл» тас жолы 1960 жылдары салынған. Содан бері ауқымды жөндеу жұмыстары жүргізілмеді.
