Солтүстік Қазақстан облысында ауыр құрт ауруы – эхинококкоздың екі жағдайы тіркелді. Инфекция ошағы үй жануарлары болуы мүмкін, деп хабарлайды Qyzyljarnews.kz тілшісі.
Санитарлық-эпидемиологиялық бақылау департаментінің баспасөз қызметі хабарлағандай, аурудың қоздырғышы – етқоректілердің ішегінде паразиттік тіршілік ететін таспа құрт. Мысықтар мен иттердің денесінде паразит дернәсілден ересек кезеңге дейін дамиды. Адам үй жануарларының нәжісімен байланысқан кезде жұқтыруы мүмкін.
Ауылшаруашылық жануарларында олардың еті, бауыры, өкпесі және басқа мүшелері инфекция көзі болып табылады. Термиялық өңдеудің жеткіліксіздігімен дернәсілдер өміршеңдігін сақтайды және тамақ арқылы адамның ішегіне, содан кейін оның бауырына немесе басқа мүшелеріне енеді.
Эмбриондар асқазанның немесе ішектің шырышты қабаты арқылы қан мен лимфаға еніп, органдар мен тіндерге таралады.
– Ол жерде эхинококк көпіршігі өсе береді, кейде тіпті жаңа туған нәрестенің басының өлшеміне жетеді. Көлемі ұлғайған сайын паразит көрші органдарды итере бастайды. Эхинококк кистасы кішкентай болса да, науқастардан ешқандай шағым болмайды. Бұл кезеңде эхинококкоз басқа ауруларға хирургиялық араласу кезінде, профилактикалық рентгендік тексеру кезінде кездейсоқ анықталады, — деп хабарлады жұқпалы және паразиттік ауруларды эпидемиологиялық қадағалау бөлімінің бас маманы Салтанат Бекумова.
Эхинококкоздың алдын алудың негізгі шаралары қаңғыбас иттерді аулау болып табылады. Ит иелері иттерін үнемі ветеринарлық бақылауда ұстап, жылына төрт рет құрттан тазартулары керек.
– Мал сою кезінде табылған эхинококкозбен ауырған мүшелерді терең көміп немесе өртеу керек, оларды полигонға апаруға, кәрізге ағызуға болмайды. Ауру жануарлардың ішкі мүшелерін иттерге беруге қатаң тыйым салынады. Жануарларды жақсы көретін балаларға аулада, көшеде қаңғыбас иттермен ойнауға болмайтынын түсіндіру қажет. Үй жануарларын сүюге, төсегіңізге жатқызуға, кәдімгі ыдыс-аяқтан тамақтандыруға және ас үйде ұстауға болмайды, — дейді Салтанат Бекумова.
