Облыстық сыбайлас жемқорлыққа қарсы іс-қимыл департаментінің мамандары ауыл шаруашылығы саласына жұмысына сыртқы талдау жүргізді, деп хабарлайды Qyzyljarnews.kz тілшісі.
Талдау көрсеткендей, ауыл шаруашылығы және жер қатынастары басқармасының, сондай-ақ 13 аудандық және қалалық бөлімдерінде сыбайлас жемқорлықтың 23 тәуекелі анықталып, 34 ұсыным әзірленді. Мәселен, жер пайдаланушылардың бірқатар әкімшілік кедергілері жойылды.
— Шалақындық «Темірханов» шаруа қожалығына жер учаскесін пайдалану құқығын ұзартпау фактісі бойынша аудандық жер қатынастары бөлімінің басшысы әкімшілік жауапкершілікке тартылып, 51750 теңге сомасында айыппұл төледі, — дейді облыстық сыбайлас жемқорлыққа қарсы іс-қимыл департаментінің басшысы Сергей Перов.
Бүгінгі таңда фермерлерді алаңдатып отырған өзекті мәселенің бірі – мемлекеттік қолдау шараларына қол жеткізу. Биыл «Qoldau» ақпараттық жүйесінің орнына «Бірыңғай мемлекеттік ақпараттық субсидиялау жүйесі» платформасы қолға алынған болатын. Департамент жүйенің жұмысына мониторинг жүргізіп, gosagro.kz бірқатар жүйелік олқылықтар мен кемшіліктерді анықтады.
