«Жастар рухы» жастар қанатының өкілдері «Қауіпсіз қала» акциясы аясында кәріз құдықтарының ашық қалу фактілеріне қатысты мониторинг жүргізді, деп хабарлайды Qyzyljarnews.kz тілшісі.
Қала көшелерінен ашық қалған құдықтар мен жөндеу жұмыстары жүргізіліп жатқан канализациялық люктерді жиі кездестіреміз. Олардың адам өміріне қаншалықты қауіпті екеніне мән бере бермейміз. Елімізде ашық қалған құдықтарға түсіп кетіп, зардап шеккендер саны көбеюде. Осындай оқыс оқиғалардың алдын алу үшін ұйымдастырылған акцияға қала әкімдігінің, облыстық төтенше жағдайлар департаментінің, полиция басқармасының мамандары жұмылдырылды. Олар қаламыздағы ашық жатқан кәріз құдықтарын анықтап, көпқабатты тұрғын үйлердің шатырларын және балалардың ойын алаңдарын тексерді.
