Петропавлда «Ринг патшасы – 2023» атты бокс спортының ардагерлері арасындағы жарыс өтуде. Биыл турнирге 47 былғары қолғап шебері қатысып жатыр, деп хабарлайды Qyzyljarnews.kz тілшісі.
«Ринг патшасы» додасы өңірде осымен 6-шы жыл қатарынан ұйымдастырылып отыр. 4 күнге созылатын бәсекеде 35 жастан асқан спорт ардагерлері өз араларында мықтыны анықтайды. Олар 6 салмақ дәрежесінде сынға түсуде.
Жарыстың ережесіне сәйкес, әр жекпе-жек 3 раундтан тұрып, әрбіреуінің ұзақтығы 3 минутты құрайды. Биыл Қазақстаннан бөлек, Ресей және Өзбекстанның спорт ардагерлері қатысуда.
– Бір күнде шаршы алаңға 9 жұп шығады. Әр салмақта «Ринг патшасы» анықталады. Жеңімпаздарға 150 мың екінші орынға 100 мың және үшінші орынға ие болғандарға 50 мың теңге көлемінде сыйақы қарастырылған, — дейді СҚО-ның кикбоксингтен аға жаттықтушысы Әділ Нұржауыпов.
«Ринг патшасы» турнирінің финалы тамыздың 30-ы күні сағат 15:00-де өтеді деп жоспарланып отыр.
