Облыс әкімі Ғауез Нұрмұхамбетов өңір аудандарын аралауды бастады. Алдымен аймақ басшысы Қызылжар ауданындағы «Қызылжар сүт» сүт фермасының жұмысымен танысты, деп хабарлайды Qyzyljarnews.kz тілшісі.
Жыл соңына дейін облыста 6 жаңа сүт кешені іске қосылады. Бұл туралы өңір басшысына оның бірінші орынбасары Марат Тасмағанбетов баяндап берді.
Сондай-ақ облыс әкімі Аққайың ауданында «Элеватор Смирновский» ЖШС-де астық қабылдау барысымен танысты. Биыл егін жинау науқаны күрделі жағдайда өтуде. Дегенмен мемлекет тарапынан диқандарға астықты ысырапсыз жинауға барынша қолдау көрсетіліп жатыр. Аграршыларға орақ науқанына қажетті қосымша 19,7 мың тонна жеңілдетілген жанар-жағармай бөлінді.
Облыс әкімі «Полтавское» серіктестігінің егіс алқаптарында астық жинау және жем-шөп дайындау барысын да тексерді. Шаруалармен кездесіп, ауыл шаруашылығын дамыту мәселелерін талқылады.
– Бүгінде облыста дәнді дақылдардың 80 пайызы жиналды. Диқандар күзгі орақты аяқтау үшін қолайлы күндерді мейлінше тиімді пайдалануы қажет, — деді СҚО әкімі Ғауез Нұрмұхамбетов.
