Петропавлдағы кардиология орталығында тәулігіне жүрекке шамамен 20 ота жасалады. Емдеу мекемесіндегі ең ұзаққа созылатын ота – аорта коронарлы шунттау болып табылады, деп хабарлайды Qyzyljarnews.kz тілшісі.
Кардиохирург-дәрігер Вячеслав Кимнің сөзінше, күретамырды аорто коронарлы шунттау – жүректің ишемиялық ауруымен ауыратын адамдардың денсаулығын қалпына келтіру мақсатында жасалады. Ол дәрілік терапия көмектеспеген жағдайда миокард инфарктісінің алдын алу үшін жүргізіледі.
– Аорто коронарлық шунттау операциясын жасаудағы мақсат – жүрек бұлшықетін қажетті қанмен қамтамасыз ету, тарылған қантамырда қан ағымын жақсарту. Хирургтардың міндеті –зардап шеккен коронарлық тамыр аймағында жүрек бұлшықетін артериялық қанмен толық қамтамасыз ету үшін жаңа арна құру. Ота нәтижесінде кейіннен миокард инфарктісінің пайда болу қаупі айтарлықтай төмендейді және стенокардия, ентігу, дәрі-дәрмекке тәуелділігі төмендеп, физикалық жағдайының жақсаруынан науқастың өмірі ұзарады, – дейді дәрігер.
Аорта коронарлық шунттау отасы 3-6 сағатқа созылуы мүмкін. Операцияның ұзақтығы оның күрделілігіне және науқастың жеке ерекшеліктеріне байланысты.
Жалпы облыстық кардиология орталығына бір жылда орта есеппен 3 мыңға жуық адам қаралуға келеді.
