Петропавл қаласындағы Ғабит Мүсірепов атындағы №43 орта мектептің үздік оқушылары ай сайын шәкіртақы алып келеді, деп хабарлайды Qyzyljarnews.kz тілшісі.
Бүгіндері №43 орта мектепте 927 оқушы білім алса, оның – 102-сі оқу озаты. Білім ордасындағы балаларға қарастырылған шәкіртақы көлемі жас ерекшеліктеріне байланысты 3 мыңнан 20 мың теңгеге дейін төленеді.
Стипендия оқушылардың білім алудағы ынтасын көтермелеу мақсатында қарастырылып отыр. Шәкіртақыны оқушыларға облысқа танымал кәсіпкер тағайындады. Меценат бұл бастаманы 2017 жылы қолға алып, үзбей жалғастырып келеді.
Мектеп басшылығының айтуынша, шәкіртақы алатын балалар сабаққа ден қойып, үнемі жоғары көрсеткіштерге жетуге тырысуда. Айталық өткен оқу жылдың қорытындысы бойынша 49 адам халықаралық, ал 56 оқушы республикалық олимпиадалар мен байқауларда жүлдегер атанды.
