Светлана Жақыпова Қазақстан Республикасының көші-қон саясатының жаңа тұжырымдамасына сәйкес жұмыс күші көп жерлерден жұмыс күші тапшы өңірлерге азаматтарды көшіру тетігі қайта қаралғанын хабарлады.
— Көшіруді ынталандыру үшін жұмыс беруші растаған жұмыс болған жағдайда жаңа орындағы тұрғын үй құнының 50% мөлшерінде материалдық көмек алуға құқық беретін экономикалық ұтқырлық сертификаттары енгізілді. Қазір солтүстік және шығыс өңірлерге 7,5 мың адам немесе жылдық жоспардың 87 пайызы қоныс аударған. Ішкі қоныс аударғандар негізінен Түркістан және Алматы облыстарының бұрынғы тұрғындары, — деді министрлік басшысы.
Оның мәліметінше, жұмыспен қамту шараларымен көшіп келген еңбекке қабілетті азаматтардың 73 пайызы қамтылды, 5,2 мың адам көшіп-қону шығындарын өтеуге біржолғы материалдық көмек алды. 622 отбасы экономикалық ұтқырлық куәлігін алды, солтүстік өңірлерде 395 отбасы баспанамен қамтамасыз етілді.
