Облыста мас күйде рөлге отырған ер адамды сот жауапкершіліктен босатты. Алайда іске араласқан прокурорлар заң бұзған жүргізушіні жауапқа тартты, деп хабарлайды Qyzyljarnews.kz тілшісі.
СҚО прокуратурасының мәліметінше, Уәлиханов ауданында ер адам мас күйде рөлге отырып, көлікпен бірнеше жерге барған. Жүргізуші әкесіне көмек керек болған соң мұндай құқықбұзушылыққа барғанын алға тартты. Сот азаматтың әрекетін құптап, жүргізушіні жауапкершіліктен босатуды шешті.
– Жүргізуші орта деңгейдегі мас күйінде көлікпен аудан орталығында жүрген. Ол банкомат пен дәріханаларға барған. Медициналық мекемелерге бармады, жедел жәрдемге жүгінбеді. Прокурор аталған қаулыға апелляциялық өтінішхат алып, жүргізушінің іс – әрекеті аса қажеттілік болып табылмағанын, ал мән-жайлар жауапкершіліктен құтылу тәсілі ретінде пайдаланылғанын растайтын материалдар ұсынды, – деп түсіндірді прокуратура.
Апелляциялық сатыдағы сот прокурордың өтінішін қанағаттандырды. Жүргізуші 15 тәулік әкімшілік қамауға алынып, 7 жылға жүргізуші куәлігінен айырылды.
