Астанада «Stem Олимпиада – білім берудегі инновация» атты халықаралық олимпиадасы өтті. Оған өңіріміздің 8 бен 11-ші сынып аралығындағы оқушылар да қатысты, деп хабарлайды Qyzyljarnews.kz тілшісі.
Халықаралық білім бәйгесі «Riviera International School by Quantum» мектебінің базасында робототехника бағыты бойынша ұйымдастырылды. Бұл сынға өңір атынан 3 команда қатысты. Олар – ЛОРД мектеп-лицей-интернаты, БЭСТ гимназиясы мен Әбу-Досмұхамбетов атындағы облыстық дарынды балаларға мамандандырылған гимназия-интернаты.
Сайыс қатысушылары роботты құрастыру, бағдарлама жасау және инженерия бойынша білімдерін көрсетті. Бұл жолы Әбу-Досмұхамбетов атындағы облыстық дарынды балаларға мамандандырылған гимназия-интернатының оқушылары бас жүлдеге қол жеткізді. Команда 4 баладан тұрды. Сондай-ақ аталмыш білім ордасының шәкірттері Батырхан Шитканов пен Дархан Төлеген «Astana it University» жоғары оқу орнының гранттарын иеленді.
