Облыстық мәслихат депутаттарының кезекті сессиясында өңір басшысы Ғауез Нұрмұхамбетов боранның салдарынан жарықсыз қалған ауылдардың жағдайына тоқталды, деп хабарлайды Qyzyljarnews.kz тілшісі.
Облыс әкімінің айтуынша, қарашаның 18-і мен 22-сі күндері аралығында қар аралас жаңбыр мен қатты желдің салдарынан өңірдің 183 ауылы электр қуатынсыз қалды. Бұл апаттық мәселені шешу арнайы штаб құрылды.
– Жұмыс тобы облыстағы барлық әлеуметтік маңыздағы нысандарды назарға алып, жарықсыз қалған объектілер қосымша электр қуатын беретін генераторларға қосылды. Аса қауіпті жағдай Мағжан Жұмабаев ауданында болды. Осы аймақта барлық тұрғын үйлер мен ғимараттар электр қуатынсыз қалды. Жылу және жарықты уақытша көрші Ресейдің облысынан тарттық. Қалған ауылдарымыз «Көкшетау – Энерго» кәсіпорнынан берілген электр энергиясымен қамтылды. Қазіргі күні көкшетаулық компания Айыртау, Тайынша, Ғ.Мүсірепов атындағы аудандардың 10 елді мекенінде жөндеу жұмыстарын жүргізуде. Бұған қоса, «Севказэнерго» АҚ-ның 46 жұмыс бригадасы 30 ауылдағы жөндеу жұмысына білек сыбана кірісіп кетті. Әлі 40 ауыл электр энергиясын толыққанды пайдалана алмай отыр, – дейді СҚО әкімі.
