«Жастар Рухы» жастар қанатының өңірлік филиалы қалалық жастар ресурстық орталығының белсенділерімен бірлесіп, «Кел, шәй ішейік!» акциясын өткізді, деп хабарлайды Qyzyljarnews.kz тілшісі.
Акция аясында белсенді жастар таңертеңнен шағын автобуспен қала ішін аралап, Петропавл көшелерін қардан тазартатын коммуналдық қызмет мамандарына тіскебасар ұсынып, шәйға шақырды. Одан бөлек жұмыс тоқтап қалмас үшін қолдарына күрек алып, жол жиектеріндегі қарды тазалап, жаяу жүргіншілер жолын мұздан тазартуға көмектесті. Жастар әрбір қала тұрғыны осы жандардың еңбегін бағалауы тиіс деп санайды.
— Осындай іс-шараларды өткізе отырып, біз жастарды ерікті болуға, әрдайым көмек қолын созуға, шетте қалмауға және адамдарға түрлі қолдау көрсетуге шақырамыз, – дейді «Жастар Рухы» жастар қанатының өңірлік филиалының төрағасы Біржан Құдайбергенов.
Аталған науқан «Ізгілік аптасы» қайырымдылық акциясы аясында ұйымдастырылды.
