Облыста қаңтардың 15-сы мен 26-сы күндері аралығында «Тұрмыс» жедел-профилактикалық іс-шарасы өткізілді. Мақсаты – отбасылық-тұрмыстық қатынастар саласында және мас күйінде жасалатын құқық бұзушылықтардың алдын алу және оларға жол бермеу, деп хабарлайды Qyzyljarnews.kz тілшісі.
Шара барысында өңірде тұрмыстық зорлық-зомбылықтың 75 фактісі тіркелді. Полицейлер тұрғылықты мекенжайы бойынша есепте тұрған 883 отбасымен жолықты.
– Тексеріс кезінде 133 азаматқа қорғаныс ұйғарымы шығарылып, сот алкогольді ішуге тыйым сала отырып, 40 құқық бұзушының мінез-құлқына ерекше талап қойды. 325 құқық бұзушы әкімшілік жауапкершілікке тартылды, оның ішінде 73-і отбасылық жанжалшыл мен агрессор, — дейді Петропавл қ. ПБ Бірінші полиция бөлімі ЖПҚБ бастығы Қанат Жұмабаев.
«Тұрмыс» жедел-профилактикалық іс-шарасы кезінде өмірлік қиын жағдайға тап болған және тұрмысы төмен 11 отбасы анықталды. Сондай-ақ алкогольге тәуелділіктен мәжбүрлеп емдеуге 9 адам арнайы медициналық мекемеге жіберілді.
