Үндістанның Дели қаласында кикбокстан халықаралық турнир өтті. Оған өңіріміздің атынан Нұрсұлтан Жақыпов қатысып, жеңімпаз атанды, деп хабарлайды Qyzyljarnews.kz тілшісі.
2022 жылғы Азия чемпионы Нұрсұлтан Жақыпов – ұлттық құраманың белді мүшесі. Жерлесіміз 86 килограмм салмақта өнер көрсетті. Жартылай финалда ол непалдық спортшыны тізе бүктірді. Ал финалда ирандық спортшымен кездесті. Нұрсұлтан барын салып, ұпай саны жағынан басым түсті.
Солтүстік Қазақстан облысы полиция департаменті бастығының бірінші орынбасары Қанат Айтбаевтың айтуынша, полиция қызметкерлерінің спорттық жетістіктері кәсібилікті арттыруда жақсы мотивация болып саналады. Құқықтық тәртіпті және қоғамдық қауіпсіздікті қамтамасыз етудегі қызметтерін мінсіз және еш қиындықсыз атқаруы үшін тәртіп сақшыларының дене дайындығы мықты болуы қажет.
