155
Петропавлдық құтқарушылар пәтерде жалғыз қамалып қалған үш жасар баланы құтқарды. Оқиға ақпанның 13-і күні орын алды, деп хабарлайды Qyzyljarnews.kz тілшісі.
СҚО ТЖД мәліметінше, кеше сағат 10:54-те «112» пультіне әйел адам хабарласып, пәтерінің есігі жабылып, үш жасар баласы үйде жалғыз қалып қойғанын айтқан. Оқиға орнына дереу жеткен жедел құтқару жасағының мамандары арнайы альпинистік жабдықтармен терезе арқылы кірді.
– Оқиға Шухов көшесіндегі көпқабатты үйлердің бірінде тіркелді. Құтқарушылар жағдайды бағамдап, Еділ Зикрин төбеден төртінші қабатқа кіріп, пәтер есігін іштен ашты. Бала дін аман, – дейді СҚО ТЖД баспасөз қызметі.
Жалпы жыл басынан бері жедел құтқару жасағы 26 үйдің есігін ашып, 9 баланы құтқарды.
