Биыл облыста егіс алқаптарын әртараптандыру бойынша жұмыс жалғасын табады, деп хабарлайды Qyzyljarnews.kz тілшісі.
Облыс әкімінің бірінші орынбасары Марат Тасмағанбетовтың айтуынша, биыл егістік алаңы — 4,5 млн. гектарды құрамақ. Оның 3,4 млн. гектарына дәнді, 751 мың гектарына майлы және 379 мың гектарына жемшөп дақылдары егіледі.
– Азық-түлік қауіпсіздігін және ішкі нарықты әлеуметтік маңызы бар өнімдермен қамтамасыз ету үшін қарақұмық алқабы 24 мыңнан 26 мың гектарға дейін, картоп – 6 мыңнан 7,7 мың гектарға дейін ұлғайтылатын болады, — деді Марат Тасмағанбетов.
Биыл топыраққа 256 мың тоннаға жуық минералды тыңайтқыштар енгізу жоспарлануда. Сұрыптарды жаңарту көрсеткіші 10% дейін жетпекші.
– Облыста су үнемдеу технологияларын қолдана отырып, суармалы жерлер алаңын біртіндеп ұлғайту жөніндегі іс-шаралар көзделген. Биыл ауыл шаруашылығы дақылдарын суару алаңы 5,4 мың гектарға дейін ұлғайтылады, — деп толықтырды облыс әкімінің бірінші орынбасары.
Биыл ауыл шаруашылығы саласына мемлекеттен 60,8 млрд. теңге бағытталады. Оның 20,4 млрд. теңгесі — өсімдік шаруашылығы саласын дамытуға жұмсалмақ.
