Өңірде көктемгі егіс науқанының қарсаңында майлы және дәнді дақылдар тұқымы тексеріліп жатыр. Бұл жұмыспен «Қазагрэкс» АҚ айналысуда, деп хабарлайды Qyzyljarnews.kz тілшісі.
«Қазагрэкс» АҚ-ның сараптама орталығы облыстың 12 ауданында жұмыс істейді. Ұйымда 27 маман бар. Зертханада дән өнгіштік, ақуыз және май құрамы сияқты бірнеше көрсеткіш бойынша тексеріледі.
Өткен жылы мамандар егіннің 230 мың тоннасын тексеріп үлгерген. Оның 168 мыңы тегін сараптамадан өтті. Бұл мақсатқа облыс қазынасынан 166 млн теңгеге жуық қаражат бөлінді.
– Сараптамадан өткен тұқымның көбісі – 1-ші, 2-ші класс. Сосын классқа жатпайтындары да бар, — дейді «Қазагрэкс» АҚ СҚФ директорының міндетін атқарушы.
Мамандардың сөзінше, бидай дәнінің ылғалдылығы 14%-дан аспауы керек. Сапасы белгілі стандарт талаптарына сәйкес келмесе, тұқымды себуге рұқсат етілмейді. Егер нәтиже оң болса, зертхана мамандары сапа сертификатын береді. Жалпы өңірде биыл 4,3 млн гектар алқапқа дәнді және майлы дақылдар егу жоспарланған.
