Петропавлдағы Жұмысшы кентінде орналасқан қоғамдық моншада болған жарылыстан жарақат алған ер адам ауруханада қайтыс болды, деп хабарлайды Qyzyljarnews.kz тілшісі ҚазАқпарат агенттігіне сілтеме жасап.
Солтүстік Қазақстан облысы төтенше жағдайлар департаменті баспасөз қызметінің мәліметінше, оқиға 3 наурыз күні болған. «112» телефон нөміріне сағат 11.20 минут кеткенде Петропавлдағы қоғамдық моншаның шатыры опырылып құлағандығы туралы хабар келіп түскен. Бір қабатты ғимараттың 30 шаршы метрі зақымданған.
Қоғамдық монша шатырының құлауына қатты отынмен жанатын қазандықтың жарылуы себеп болған. Салдарынан 1983 жылы туған пеш жағушы қатты күйік алды. Ол бірден ауруханаға жеткізілді. Апат болған кезде моншада басқа ешкім болмаған.
СҚО денсаулық сақтау басқармасы баспасөз қызметінің мәліметінше, ер адамның денесінің 80 % күйік шалған. Дәрігерлер оның өмірі үшін күрескенімен, 7 наурызда қайтыс болды.
