Петропавл қаласының әкімшілік құқық бұзушылық жөніндегі мамандандырылған соты гаражында үлкен мөлшерде акцизі жоқ спирттік ішімдіктерді сақтаған қала тұрғынына айыппұл салды, деп хабарлайды Qyzyljarnews.kz.
Жеке кәсіпкер Петропавлдағы Интернационал көшесінде орналасқан гаражда «Пшеничная» деген жапсырмасы бар 420 бөтелке арақ және 47 шөлмек «Джек Даниэлс» вискиін сақтаған. Акцизделуі тиіс алкоголь өнімінің сәйкестендіру құралдары және тіркеу-бақылау маркалары болмаған.
Сотта қала тұрғыны 2014 жылдан бері жеке кәсіпкер ретінде тіркелгенін, бірақ алкоголь өнімдерін сақтауға және сатуға лицензия алмағанын айтты.
Сот қаулысымен жеке кәсіпкер кінәлі деп танылып, 150 айлық есептік көрсеткіш – 554 мың теңге мөлшерінде айыппұл салу түріндегі әкімшілік жаза қолданылды. Алкоголь өнімі тәркіленді. Тәркіленген спирттік ішімдік енді жойылуы тиіс.
