Облыстың бес ауданында 9 ірі қарадан бруцеллез анықталды. Ауру малдар сою алаңына жіберілді, деп хабарлайды Qyzyljarnews.kz тілшісі.
Бруцеллезді жұқтырған малдың дені –Қызылжар ауданында, Айыртау, Аққайың, Ақжар және Тимирязев аудандарында бір-бір фактіден анықталды.
– Жұқпалы ауру Тимирязев ауданындағы Докучаево елді мекеніндегі орналасқан «Атамекен-Агро-Тимирязево» жауапкершілігі шектеулі серіктестігі мен Айыртау ауданына қарасты Шалқар ауылындағы «Юлия» шаруа қожалығында тіркелді. Бруцеллезге шалдыққан мал тұрғындардың жеке қора-қопсаларында да анықталды, – дейді облыстық ветеринария басқармасының бөлім басшысы Қайырлы Қазанов.
Әзірге ауру анықталған аудандарда шектеу шаралары енгізілген жоқ. Шешімді ауылдық округ әкімі қабылдайды.
– Өткен жылдың шілде айынан бастап бруцеллезге байланысты Аққайың ауданына қарасты Ленинское елді мекенінде шектеу шаралары алынған жоқ. Қазіргі уақытта бұл ауылда республикалық эпизотикалық жасақ мамандары әр 15-20 күн ішінде ірі қарадан сынама алып жатыр. Егер сынама екі мәрте теріс нәтиже көрсетсе ғана шектеулер алынады, – дейді Қайырлы Қазанов.
Облыстық ветеринария басқармасының мәліметінше, көктемгі жоспарлы профилактикалық шаралар аясында 177 431 малдан қан сынамасы алынды. Оның ішінде – 76049-ы ірі қара, 100803-і ұсақ мал басы, 450-і шошқа, 103-і жылқы және 26-сы ит.
Статистикалық мәліметтерге сүйенсек, өткен жылы дәл осы мерзім ішінде бруцеллезге 44 ірі қара шалдықса, жыл басынан бері қауіпті кесел 272 малда анықталды.
