Петропавлда мұғалімдер арасында «Жүзден жүйрік» байқауы өтті. Оған өңірдің тіл мамандары қатысты, деп хабарлайды Qyzyljarnews.kz тілшісі.
Облыста дәстүрлі түрде өткізілетін байқау 23-ші рет ұйымдастырылып жатыр. Байқау филолог Құдайберген Жұбановтың 125 жылдығына арналды. Атақты ғалым 10-нан астам тілді меңгерген екен. Байқаудың мақсаты – мұғалімдердің кәсіби құзыреттілігін дамыту.
Жарысқа қатысушылардың бірі – Қызылжар ауданы №3 Бескөл орта мектебінің қазақ тілі мен әдебиеті пәні мұғалімі Айымгүл Тасимова.
– Бүгінгі меніңтақырыбым – оқушылардың айтылым дағдысын қалыптастыру. Ол тек қана өз пәнімде емес, өзге пәндерде қолданылады, – дейді мұғалім.
Байқауға 160-тан астам педагог қатысуға ниет білдірген. Оның тек 50-ге жуығы екінші кезеңге өткен. Мұнда мұғалімдер сайысып қана қоймай, бір-бірімен тәжірибе алмасып, ой-пікірлерін білдіреді. Берілген уақыттың ішінде мұғалімдер өз жұмыстарын таныстырып шығулары қажет.
– Бірінші кезеңде педагогтердің пәндік біліктіліктерін анықтау мақсатында тест тапсырмасы болды. Ол онлайн режимде өтті. Екінші кезеңге қазақ тілі пәні бойынша – 15, орыс тілі бойынша осынша мұғалім өткен. Ал ағылшын тілі пәні бойынша 16 мұғалім біліктілігін сынға салды, – дейді “Өрлеу” БАҰО” АҚ СҚО бойынша ПҚ БАИ аға оқытушысы Гүлзат Әлжанова.
