СҚО ПД есірткі қылмысына қарсы іс-қимыл басқармасының қызметкерлері қала тұрғынынан аса ірі көлемдегі синтетикалық есірткінің партиясын тәркіледі, деп хабарлайды Qyzyljarnews.kz тілшісі.
Полицияның мәліметінше, Петропавлдық 39 жастағы келіншек синтетикалық есірткі сататын интернет-дүкендердің бірінде қаптаушы болып жұмыс істеген. Күдіктіні ұстау кезінде оның қалтасынан, пәтерінен аса ірі көлемде наша табылды. Сараптама көрсеткендей, алынған заттың жалпы салмағы 227,97 грамды құрап, «α-PvP» синтетикалық препараттары анықталып, мефедронның 57,57 грамы тәркіленді. Сондай-ақ, баспананы тінту барысында электронды таразылар, буып-түю материалы және есірткіні орауға арналған басқа қаптамалар алынды.
– Күдікті есірткіге тәуелді, бұрын есірткі сақтағаны үшін сотталған. Енді ол аса ірі мөлшерде есірткі сатқаны үшін 10 жылдан 15 жылға дейін бас бостандығынан айырылуы мүмкін, — деп нақтылады СҚО ПД есірткіге қарсы іс-қимыл басқармасының бастығы Руслан Сапаров.
Жыл басынан бері полицейлермен СҚО аумағында 2 кг-нан астам синтетикалық есірткі тәркіленді.
