СҚО прокурорлары мемлекеттік сатып алу саласындағы қадағалауды күшейтіп, мемлекеттік қызметшілердің жауапкершілігін қатаңдату бойынша шараларды қабылдады, деп хабарлайды Qyzyljarnews.kz тілшісі.
СҚО прокуратурасының мәліметінше, жыл басынан облыста мемлекеттік сатып алу саласында қадағалау органының актілері бойынша 3,3 млрд. теңгеге 11 заңсыз конкурстың күші жойылып, 17 лауазымды тұлға түрлі жауапкершілікке тартылды. Оның алтауы мемлекеттік қызметтің беделін түсірген, 3 қызметкер жұмыстан босатылып, үшеуіне қызметке толық сәйкес еместігі туралы ескерту жасалды.
– Тимирязев ауданының тұрғын үй-коммуналдық шаруашылығы бөлімінің басшысы мемлекеттік сатып алу және мемлекеттік қызмет туралы заңнама талаптарын бұза отырып, орындалған жұмыс актілеріне қол қойып, жеткізушіге тарату желілерін қайта құрудың жобалық-сметалық құжаттамасын әзірлегені үшін, іс жүзінде орындалмаған жұмысқа 6,7 млн. теңге көлемінде төлем жасаған. Сондай-ақ Тимирязев ауылдық округі әкімінің м.а. балалар спорт алаңын салу бойынша іс жүзінде орындалмаған жұмысқа 19,9 млн. теңге сомасында қаражат төлеген. Осындай заң бұзушылықтарға Аққайың ауданы Астрахан ауылдық округінің әкімі де жол бергені анықталды. Осылайша алаң аумағын тегістеу, жоспарлау және дайындау жұмыстары орындалмағанымен 1,3 миллион теңге төленді. Қадағалау органының актілері және СҚО мемлекеттік қызмет істері департаментінің Әдеп жөніндегі кеңесінің ұсыныстары бойынша жұмыстан босату түрінде тәртіптік шаралар қабылданды, — делінген прокуратура мәлімдемесінде.
Қазіргі уақытта жергілікті атқарушы органдар қаржылық бұзушылықтарды жою шараларын қабылдауда.
