Павлодарда волейболдан ерлердің Ұлттық лига командалары арасында ХХХ Қазақстан чемпионатының қола жүлдегері анықталды, деп хабарлайды Qyzyljarnews.kz тілшісі.
Үшінші орынды сарапқа салу үшін алаңға «Есіл» (СҚО) мен «Атырау» командалары шықты. Бұған дейін атыраулықтарды 3:0 есебімен жеңген солтүстікқазақстандықтар осы жолы да мүлт кетпеді. Алексей Терениннің шәкірттері айқын басымдықпен жеңіске жетті.
— Өткен жылы бесінші орынды қанағат тұтсақ, биыл қола жүлдеге қол жеткіздік. Жалпы, маусым барысында түрлі турнирлерде үш медаль алдық. Бұл маусымның табысты өткенін білдіреді. Келесі чемпионатқа да мұқият дайындаламыз. Петропавл қаласында спорт сарайы салынып жатыр. Бәлкім, алдағы маусымда Ұлттық лиганың турын қабылдап қалармыз, — деді Алексей Теренин.
Плей-офф кезеңінде фаворит саналған Оралдың «Жайығын» жеңіп, сенсация жасаған «Атыраудың» бас бапкері Юрий Лабецкий бұл жолы жас ойыншыларға үміт артқанын айтты.
Ал ел біріншілігінде «Тараз» командасы алтын және «Павлодар» клубы күміс жүлдегер атанды.
