Облыстың 4 ауданында мәслихаттардан шығып қалған депутаттардың орнына жаңа халық қалаулылары сайланды, деп хабарлайды Qyzyljarnews.kz тілшісі.
СҚО сайлау комиссиясының мәліметінше, саяси науқан наурыздың 31-і күні Айыртау, Ақжар, Ғабит Мүсірепов атындағы және Тайынша аудандарында өтті.
Айыртау ауданында бірмандаттық аумақтық сайлау округі бойынша сайлаушылар тізіміне 1782 азамат енгізіліп, дауыс беруге – 1165 азамат қатысты. Үш үміткердің ішінен № 9 сайлау округі бойынша 953 дауыс жинаған Данияр Бестаев аудандық мәслихаттың депутаты болып сайланды.
Ал Ақжар ауданында 579 сайлаушы қатысып, № 4 сайлау округі бойынша Сәуле Ахметова аудандық мәслихатқа депутат болып таңдалды.
Ғабит Мүсірепов атындағы ауданда сайлау қорытындысы бойынша № 4 сайлау округі атынан жергілікті мәслихатқа Ербол Боранбаев, № 9 сайлау округінен Раушан Мұстафина депутат болып сайланды.
Тайынша ауданының мәслихатына 1104 дауыс жинаған Мереке Хамзин халық қалаулысы болды.
