Облыста жұмыс бабымен жүрген ҚР Премьер-Министрінің бірінші орынбасары Роман Скляр тасқын жағдайына байланысты жиналыс өткізді, деп хабарлайды Qyzyljarnews.kz тілшісі.
Бірінші вице-премьер стратегиялық маңызы бар нысандар мен бөгеттердің жағдайын тексеріп, құрылыс және жол компанияларының басшыларымен кездесті. Үлкен су келген ауылдардың тұрғындарымен де жүздесіп, мемлекет барлық көмекті жасайтынын жеткізді.
ҚР Премьер-Министрінің бірінші орынбасарының тапсырмасы бойынша бөгеттерді нығайту және оларды ұзарту, күштер мен арнайы техниканың санын көбейту, мобилді топтар құру бойынша жұмыстар атқарылуда.
— Өңірде тасқын жағдай күрделі болып барады. Бүгін таңертең Сергеев су қоймасында асып төгілу 415 см құрады. 2017 жылғы тасқынның көрсеткіштерінен әлдеқайда асып түсті. Сондықтан, елді-мекендер мен облыс орталығын судан қорғау үшін күні-түні іс-қимылдар жасалуда. Ең бастысы тұрғындарды қауіпсіз жерге көшіру және мүлікті сақтауға, үлкен судың келе жатқаны туралы дер кезінде ақпарат беруге көп көңіл бөлу керек, — деп жазды әлеуметтік желіде СҚО әкімі Ғауез Нұрмұхамбетов.
