Аптаның соңында тасқын су Петропавлға жетпек. Петропавлдық полицейлер су басу қаупі жоғары 18 саяжай қоғамына тиесілі үйлерді аралап, түсіндіру жұмыстарын жүргізді, деп хабарлайды Qyzyljarnews.kz тілшісі.
Саяжай учаскелерінің иелері су тасқынына алдын-ала дайындалуда. Бірі қажетті құрал-саймандарын, бірі үйлерден жиһаздарын алып кетіп жатса, енді басқалары отырғызған көшеттерін құтқарумен әлек.
Полицейлер тұрғындармен тілдесіп, су тасқыны кезінде саяжайларға келуге және түнеуге болмайтынын ескертті. Әр саяжай қоғамының кіре-берісінде полицейлер кезекшілік етпек.
– Қайғылы оқиғалардың алдын алу үшін 70 қызметкер рейдке қатысты. Әр саяжай қоғамында бекеттер қойылды. Қызметкерлер адамдардың су басу аймағында болуына жол бермеуі керек. Сонымен қатар тонау фактілерінің алдын алу шаралары да назарда, — дейді Петропавл қаласы полиция басқармасының бастығы Марат Жұмалиев.
