Қала әкімі Серік Мұхамедиев Былғары зауыты кентіне барып, жергілікті тұрғындармен тілдесті, деп хабарлайды Qyzyljarnews.kz тілшісі.
Былғары зауыты кентіндегі судың деңгейі төмендеп, тұрғындар үйлеріне орала бастады. Бүгіндері баспаналарына қайта көшіп келгендерге таза ауыз суды жеткізу мәселесі шешіліп, гуманитарлық көмекті әкелу жайы да ойластырылып жатыр. Қала әкімінің айтуынша, қоқысты тазарту жұмыстарына арнайы механикалық бригадалар тартылады.
– Қала бойынша тасқын судың салдары 2 мың үй мен 34 саяжай қауымдастығына тиді. Қазіргі уақытта 1665 тұрғын біржолғы әлеуметтік материалдық көмек алды. Бұл жұмыс әлі де жалғасын табуда. Заңға сәйкес, табиғи апаттан зардап шеккен азамат назарсыз қалмайды, — деді қала әкімі.
Естеріңізге салсақ, бүгіндері Солнечный кентінде 100 жаңа жер үй салынуда.
