Облыста жыл басынан бері 25 жол-көлік оқиғасы тіркелді. Салдарынан 2 адам қаза тауып, 24-і түрлі дене жарақатын алды, деп хабарлайды Qyzyljarnews.kz тілшісі.
СҚО ПД мәліметінше, өңірде «Құқықтық тәртіп» жедел алдын алу іс-шарасының бірінші кезеңі аяқталды. Нәтижесінде полицейлер жүргіншілер тарапынан жол қозғалысы ережесін бұзудың 315 дерегін анықтады. 25-сінде теміртұлпарды тізгіндегендер жаяу жүргіншілерді қағып кеткен.
— Жолды белгіленбеген жерде немесе бағдаршамның тыйым салынған сигналына өту — жолдарда ең жиі тіркелетін деректердің қатарында. Мәселен, 20 мамырда аяқталған «Құқықтық тәртіп» жедел-алдын алу іс-шарасының алғашқы 10 күні ішінде облыста жаяу жүргіншілер 315 рет жол жүру ережесін бұзған. Бұл көлік жүргізушілерінің жаяу жүргіншілер өткелдерінен өту ережесін бұзудан әлдеқайда көп, мұндай 29 факті тіркелген. Жол қозғалысының барлық қатысушыларынан жол қозғалысы ережелерін қатаң сақтауды сұраймыз. Естеріңізде болсын, жолдағы қауіпсіздік жеке тәртіптен басталады, — дейді СҚО полиция департаменті жергілікті полиция қызметі басқармасы бастығының міндетін атқарушы Александр Розбах.
