Ақжар ауданындағы Кіші-Қараой мектебінің қабырғасы көгеріп, едені шіріп, опырылып жатыр. Тозығы жеткен оқу ұясында 72 бала білім алады. Сонымен қатар, шағын орталыққа 15 ұл-қыз барады. Апаттық жағдайда оқитын балалардың ата-аналары оқушылардың денсаулығына алаңдап, дабыл қағуда, деп хабарлайды Qyzyljarnews.kz тілшісі.
Үш қабатты ғимарат осыдан 44 жыл бұрын салынған. Ауыл тұрғындарының сөзінше, нысан содан бері бірде-бір рет күрделі жөндеу көрмепті. Күтім көрмеген шатырдан аққан судың кесірінен мектеп бөлмелерінің қабырғасы дым тартып, тіпті көгеріп кеткен.
– Шатыр тозған. Спорт залы мен акт залының төбесінен су сорғалайды. Сондықтан дене шынықтыру сабақтары кабинеттерде өтеді. Күрделі жөндеу жүргізу үшін жобалық-сметалық құжаттар әзірленді. Жөндеу жұмыстарына 250 млн теңге керек. Қаржы бөлінсе, күрделі жөндеу басталады. Тек төбені ғана емес, мектеп ішін түгел жаңалау керек, – дейді облыстық білім басқармасының басшысы Нәзір Жәшібеков.
Солтүстік Қазақстан облыстық білім басқармасының мамандары соңғы 3 жылда 14 миллиард теңгеге жуық қаржыға 302 мектеп жөндеу көргенін айтады. Биылғы жылы тағы 25 білім ұясы жаңартылмақ. Бүгінде өңірдегі 39 нысан күрделі жөндеуді қажет етеді.
