Қазақстанда темекі шегу көрсеткіші төмендеді. Бірақ, тұрғындар арасында вейпке әуестік артып барады, деп хабарлайды Qyzyljarnews.kz тілшісі.
Денсаулық сақтау саласының мамандарын, әсіресе балалар мен жасөспірімдердің зиянды затқа тәуелді болып бара жатқаны алаңдатады.
-Алдағы уақытта снюстерге ұқсас вейп айналымына қатаң тыйым салу керек. Сондай-ақ қыздырылатын темекі мен оны тұтыну құрылғыларына акциз салымдарын арттыру керек. Өйткені олар темекімен теңестірілді, деді Ұлттық денсаулық сақтау орталығының сарапшысы Жанар Қалмақова.
Жанар Қалмақова халық арасында жүргізіліп жатқан темекі шегуге қарсы күрес оң нәтиже беріп жатқандығын атап өтті. Бұған «Халық денсаулығы және денсаулық сақтау жүйесі туралы» Кодексте қолданылатын мемлекеттік бақылау шаралары мен заңнамалық тетіктер ықпал етуде. Темекі өнімдерін бақылау шаралары осыдан 13 жыл бұрын қабылданып, 2020-жылы күшейтілген болатын. Осының арқасында темекі тұтыну көрсеткіші шамамен 7 пайызға төмендеді.
2007-жылы қазақстандықтардың шамамен 27 проценті темекіге әуес болды. Дегенмен, 2019-жылы ересектер арасында шылым шегу 20,4 пайызға дейін төмендегені байқалған. Бүгінде зиянды әдеттен ерлердің 36,5, ал әйелдердің 6 проценті зардап шегіп отыр.
