Химия-биология бағытындағы Назарбаев зияткерлік мектебінің 12-сынып оқушысы Тамирлан Мейрам әлемнің озық университетінде тегін оқу мүмкіндігіне ие болды, деп хабарлайды Qyzyljarnews.kz тілшісі.
Жерлесіміз шетелдегі жоғары орнына түсу үшін қатаң іріктеу кезеңінен өткен. New York университетінің Абу-Дабидегі бөлімшесінің гранты 4 жылдық оқу шығындарын, медициналық сақтандыру, сонымен қатар жол ақысы мен ай сайынғы стипендияны қамтиды.
Жалпы, әр жыл сайын аталған университетке түсуге 100 мыңнан астам түлек өтініш береді. Оқу ордасы әлемдегі атақты, беделді университеттердің қатарында. «New York University in Abu-Dhabi» 2020 жылы Америка құрама штаттарының үздік университеттері тізімінде 11 орынға ие болды. Ал «Quacquarelli Symonds» әлемдік рейтингінде 35-ші сатыдан көрінді. Ол АҚШ-тағы ең ірі жекеменшік зерттеу университеті болып саналады. Университетте 50 мыңнан астам студент білім алады. Нью-Йорк университеті 16 мектеп, институт және колледждерден құралған.
