Петропавл қаласында 12-13 наурыз аралығында тағы да су беру тоқтатылады. Бұл су берудің үстіміздегі жылы төртінші рет тоқтатылуы. «Қызылжар су» жауапкершілігі шектеулі серіктестігінің хабарлауынша, су берудің уақытша тоқтатылуына бірінші көтерілімдегі сорғы станциясына екі жаңа су асты сорғыларын орнату себеп болған.
Бұл жұмыстар көктемгі су тасқыны кезеңіне дайындық мақсатында жүргізілуде. Аталған сорғылар су тазарту құрылғыларына су жеткізуге арналған, олар су астында жұмыс істей алады және қашықтан басқару жүйесімен жабдықталған.
Қала тұрғындарына 12 наурыз күні сағат 22:00-ге дейін су жинап алу ұсынылады. Суды қайта қосу 13 наурыз күні сағат 22:00-ге жоспарланған. Су шектеу кезінде әлеуметтік нысандарға су тасымалдау ұйымдастырылады.
QYZYLJAR NEWS
