Осы күнге дейін мектеп бітіруші түлектер IT-бағыттарына оқуға түсу үшін ҰБТ-да физикадан тест тапсырып жүрді. Ендігі кезекте бейіндік пәннің орнын информатика баспақ, деп хабарлайды Qyzyljarnews.kz тілшісі.
Білім және ғылым министрлігіне IT-саласы бойынша оқығысы келетін талапкерлер үшін ҰБТ тапсыру кезінде бейіндік пәндер қатарына «Информатика» пәнін енгізу туралы көптеген өтініштер келіп түскен.
Соған байланысты министрлік талдау жүргізіп, 2022-2023 оқу жылында «Информатика пәні мұғалімдерін даярлау», «Ақпараттық технологиялар» және «Ақпараттық қауіпсіздік» білім беру бағдарламалары топтарына түсетін оқушылар ҰБТ-да «Математика+Физика» орнына «Математика+Информатика» комбинациясын тапсырады деген шешім қабылдады.
Биылғы түлектер бұрынғыдай физика пәнінен тест тапсырады. Дегенмен, талапкерлердің таңдауына қарай наурыздағы ҰБТ кезінде «Математика +Информатика» комбинациясы бойынша сынақ тапсыру мүмкіндігі де қарастырылған.
