Теріскейлік 2 тұрғын кибералаяқтардың кесірінен 5 млн. теңгесінен айырылып қалды, деп хабарлайды Qyzyljarnews.kz тілшісі.
Петропавлдағы №2 полиция бөліміне белгісіз біреулердің өз есепшотынан 2 миллион теңге алғанын айтып ер адам шағымданды. Интернет-алаяқ әдеттегідей, өзін банк қызметкерімін деп таныстырған көрінеді. Картадағы ақшаңызды бөтен біреулер аударып алмақшы деп, қауіпсіздік мақсатында телефоныңызға келген смс кодты айтуын сұраған. Жұмысынан қолы босамаған жәбірленуші керекті сандарды атаған. Ақыр соңында сан соғып қалғанын түсінді.
-Арада бірнеше күн өткеннен кейін осыған ұқсас тағы бір жағдай тіркелді. Петропавлдық әйел адам бейтаныс жандардың сансыз қоңырауынан кейін ұсынылған шотқа 3 миллионнан астам ақшасын аударып жіберген. Өзінің айтуына қарағанда, ол киберқылмыскерлердің қалай әрекет ететіні жайлы білген. Сонда да осы жолы алаяқтардың сөзіне иланып, сан соғып қалды,-дейді Петропавл қалалық №2 полиция бөлімінің бастығы Руслан Сыздықов.
Бұл ретте тәртіп сақшылары жеке деректермен құпия кодтарын, банк карталарының cvv-кодтарын, sms-хабарламамен келетін бір реттік кодты ешкімге айтуға болмайтынын тағы бір мәрте еске салады. Егер де белгісіз біреулер хабарласып, жаттанды сценариймен санаңызды улайтын болса, банк филиалына барып, мән-жайдың анық-қанығына көз жеткізу қажет.
