Кеше Бейжіңдегі қысқы Олимпиада ойындары өз мәресіне жетті. Дүбірлі додаға 91 елдің спортшылары қатысып, жарыстың 109 түрі бойынша жүлделер сарапқа түсті, деп хабарлайды Qyzyljarnews.kz тілшісі.
Жекелей тоқталсақ, Олимпиада ойындарында Норвегия құрамасы 16 алтын, 8 күміс және 13 қола медаль иеленіп, үздік атанды. Ал екінші орынды 12 алтын, 10 күміс пен 5 қола медаль ұтып алған Германия құрамасы иеленді. Үздік үштік қатарынан Қытай да шет қалмады. Спортшылар 9 алтын, 5 күміс пен 2 қола жүлдеге ие болды.
Өкінішке қарай, Бейжіңдегі Олимпиада ойындарында Қазақстан командасына жүлде бұйырмады. Ең жоғарғы нәтижені Абзал Әжіғалиев көрсетті. Ол шорт-тректен 500 метр қашықтықта өткен жарыста жеңіске бір табан жақындап, төртінші орын алды.
Еске сала кетейік, бұған дейін үш қысқы сайыстар кезінде отандық спортшылар жеңіс тұғырынан көрінген болатын. 2010 жылы Елена Хрусталева күміс, 2014 жылы Денис Тен қола, сонымен қатар 2018 жылы Юлия Галышева қола медальға ие болды.
