Петропавлда аулаішілік жолдарға қиыршық тас пен асфальт төсеу кезінде бірқатар заң бұзушылықтарға жол берілгені анықталды, деп хабарлайды Qyzyljarnews.kz тілшісі.
СҚО бойынша ішкі мемлекеттік аудит департаментінің қызметкерлері қалалық ТҮКШ бөліміне жолдар мен аулаларда жұмыстар жүргізу кезінде бюджет қаражатын пайдалану мәселесі бойынша тексеріс жүргізді.
Сарапшының қорытындысына сәйкес, 2020 жылдың сәуірінен бастап 2021 жылдың қазанына дейін аула ішіндегі өтпе жолдарға асфальт төсеуге және қиыршық тас салуға арналған сметалық есептеулерде қиыршық тас құны өңірдегі базалық бағасынан орта есеппен 1,7 есе жоғары көрсетілген. Нәтижесінде шығын шамамен 679 миллион теңгеге көбейген.
— Бөлім басшысы әкімшілік жауапкершілікке тартылды. Департамент СҚО мамандандырылған экономикалық сотына ұйғарымды орындауға мәжбүрлеу туралы талап арыз берді. Аудит материалдары қылмыстық қудалау органдарына процессуалдық шешім қабылдау үшін жіберілді, — делінген департаменттің хабарламасында.
