Компьютер, мопед, велосипед және түрлі металл бұйымдар қолды болды. Қалалық №2 полиция басқармасына заттарының жоғалғанын айтып, бірден 2 тұрғын шағымданған. Ұрланған дүниелердің жалпы сомасы 300 мың теңгеден асады, деп хабарлайды Qyzyljarnews.kz тілшісі.
Аталмыш іс Қазақстан Республикасы Қылмыстық кодексінің 188-бабы «Ұрлық» бойынша Сотқа дейінгі тергеп-тексерулердің бірыңғай тізіміне енгізілді. Жедел іздестіру шаралары барысында 22 жастағы петропавлдық ұсталды. Ол бұрын дәл осыған ұқсас қылмыс жасағаны үшін бірнеше рет сотталған. Тексеру кезінде баукеспенің тағы 2 ұрлыққа қатысы бары анықталды. Одан бөлек, 6 пәтерге түскен деген күдік бар. Жиналған материалдар сотқа жіберілді. Күдікті уақытша оқшаулағышқа қамалды. Ал ұрланған заттардың бір бөлігі қайтарылды.
-Қайталап жасалатын қылмыстарға қарсы күрес – полиция органдарының маңызды міндеттерінің бірі. Бұл ретте учаскелік полиция инспекторларына үлкен жауапкершілік жүктелген. Олар өз әкімшілік учаскелерінде бұрын сотталған тұлғалармен профилактикалық жұмыстар жүргізеді. Бұл жұмыс өз нәтижесін беруде. Жалпы облыс аумағында қайталап жасалатын қылмыстардың азайып жатқанын аңғардық. Өткен жылдың қорытындысы бойынша көрсеткіш 19,5% құрады, — деді дейді СҚО ПД бастығының бірінші орынбасары Қанат Айтбаев.
