«Отбасы банкінің» базасында қазақстандықтарды тұрғын үймен қамту орталығы ашылады. Жаңа жобаның аясында пәтерге мұқтаж жандар кезекке тұра алады, деп хабарлайды Qyzyljarnews.kz тілшісі.
Қазақстан Республикасы Индустрия және инфрақұрылымдық даму вице-министрі Еркебұлан Дауылбаев есепке қоюдың жаңа тәртібіне сәйкес тұрғын үйге мұқтаждардың жаңа базасына кезекке тұру құқығы қандай да бір санатқа жататындығына қарамастан, соңғы 10 жыл ішінде тұрғын үйі жоқ барлық азаматтарға берілетінін айтты.
— Тұрғын үйді бөлу есепке қою күніне және табыс деңгейіне байланысты жүзеге асырылатын болады. Табысы ең төменгі күнкөріс деңгейіне дейінгі кезекте тұрғандарға отбасының әрбір мүшесіне жеке тұрғын үй қорынан жалға алынған тұрғын үй үшін жалдау төлемдерін субсидиялау түрінде мемлекеттік қолдау шаралары көрсетіледі, — деп атап өтті вице-министр.
Егер кезекте тұрғандардың табысы ең төменгі күнкөріс деңгейінен жоғары болса, ол отбасыға тұрғын үй қарыздары түрінде мемлекеттік қолдау шаралары көрсетілетін болады.
