Қазақстанда қаңтар айында орын алған тәртіпсіздіктер кезінде 230 адам қаза тапты. Оның 19-ы әскерилер мен қауіпсіздік қызметкері. Мәжіліс отырысында Қазақстан Республикасының Бас прокуроры Берік Асылов осылай мәлімдеді, деп хабарлайды Qyzyljarnews.kz тілшісі.
Әсіресе, Алматы қаласында адам шығыны көп тіркелді, онда 139 адам көз жұмды.
-Бүгінде әкімшілік ғимараттарға жасалған шабуыл кезінде және тәртіп орнату барысында 86 адамның қаза тапқаны анықталды, — деді Берік Асылов.
Сонымен қатар, еліміздің Бас прокуроры 7 өңірде әкімдік ғимаратына, полиция және ҰҚК-нің ғимараттарына шабуыл жасау кезінде полицейлер 63 адамды өлтіргенін атап өтті.
-Қазіргі уақытта 20 жазықсыз адамның оқыстан оққа ұшқаны белгілі болды. Олардың 11-і Алматыда, 8-і Алматы облысында, ал біреуі Тараз қаласында, — деді бас прокурор.
