2021 жылы Солтүстік Қазақстан облыстық прокуратурасында 3,5 мың кәсіпкердің құқығы қорғалды, деп хабарлайды Qyzyljarnews.kz тілшісі.
Өткен жылы кәсіпкерлердің құқығын бұзуға қатысты 79 хабар келіп түсті. 24 жағдайда кәсіпкерлердің құқықтарын қорғау үшін актілер жазылды, 15 адам тәртіптік жауапкершілікке тартылды. Сонымен қатар, 6 заңсыз тексерудің күші жойылды, тағы 7 тексеру заңсыз деп танылды.
Биыл тексеруші органдар қызметінде заңға қайшы әрекеттердің жасалғаны белгілі болды. Яғни, олар заңсыз тексерулер жүргізіп, кәсіпкерлерді негізсіз әкімшілік жауапкершілікке тартқан.
– Сондай-ақ, прокуратураның араласуымен құрылысты тоқтата тұру туралы тыйымның күші жойылды, жұмыс қайтадан жанданды. Қадағалау актісімен карантин кезеңінде демалыс күндері дәмхананың жұмысын шектейтін әкімшілік кедергілер жойылды. Бұл оларға өз қызметін жалғастыруға мүмкіндік берді. 12 бизнес субъектісінің құқықтары қорғалды, – деп хабарлады Солтүстік Қазақстан облыстық прокуратурасының қоғамдық мүдделерді қорғау басқармасының аға прокуроры Тимур Құртаев өңірлік коммуникациялар қызметінде өткен брифингте.
