Тоқшын ауылындағы мектепте орын алған оқиғаға қатысты облыстық білім басқармасының басшысы Нәзір Жәшібеков түсініктеме берді, деп хабарлайды Qyzyljarnews.kz тілшісі.
Төбесі опырылған акт залы Тоқшын мектеп-гимназиясының ғимаратына жапсарлас салынған. Оқиға кезінде ешкім зардап шеккен жоқ.
Нәзір Жәшібековтың сөзінше, шатыр жартылай құлаған. Бүгінде білім ошағында 293 оқушы бар. Мәселе шешілгенше олар қашықтан оқымақ.
-Оқиға орнына уәкілетті органдардың басшылары барды. Мән-жайды анықтау және шара қабылдау үшін арнайы комиссия құрылды. Болжам бойынша іргетастың шөгуі және шатырдан судың ағуы салдарынан осындай жағдай орын алып отыр. Биыл әкімдік мектепті жөндеуге қосымша қаражат бөліп, мектептің шатырын, акт залы мен интернат ғимаратының шатырын ауыстыруды көздеп отыр, — деді Нәзір Жәшібеков.
