Былтыр СҚО-да 8469 адам қайтыс болды. Бұл республикалық көрсеткіштен екі есе көп. Солтүстікқазақстандық дәрігерлер өлім-жітімге әкелген негізгі себептерді атады, деп хабарлайды Qyzyljarnews.kz тілшісі.
СҚО денсаулық сақтау басқармасының басшысы Нұрлан Аймановтың айтуынша, былтыр облыста 8469 тұрғын көз жұмды. 2020 –сыншы жылмен салыстырғанда 13,4 %-ға артқан.
-Былтыр тыныс алу органдарының ауруларынан 1841 адам қайтыс болды. 2020 жылмен салыстырғанда 350 адамға өскен. Бұған — коронавирус инфекциясы да себеп болды. Қан айналу жүйесінің ауруларынан 1171 тұрғын көз жұмды, 2020 жылмен салыстырғанда 65 адамға көп, әсіресе облыстың 11 ауданында өлім-жітім көбейді. Ал 606 адам ас қорыту органдарының ауруларынан дүниеден өткен. Көрсеткіш оның алдындағы жылдан 69-ға аз. Онкологиялық аурулардан қайтқандардың саны 2020-сыншы жылмен шамалас, 561 адам қайтыс болды. Түрлі жарақат пен уланудан 520 тұрғын көз жұмған. Мұнда да төмендеу байқалады, — дейді Нұрлан Айманов.
Сондай-ақ, коронавирустың салдарынан 437 солтүстікқазақстандық марқұм болды.
-СҚО қартаю индексі бойынша республикада бірінші орында, республика бойынша 26,1 болса, Солтүстік Қазақстанда — 62,1. Егде жастағы адамдардың көпшілігінде әдетте түрлі созылмалы аурулар бар, бұл коронавирус инфекциясымен ауырған кезде өлім-жітімнің өсуіне тікелей әсер етті. Қайтыс болғандардың 78 %-дан астамы – егде жастағылар, — дейді денсаулық сақтау басқармасының басшысы.
Фото: ашық дереккөздерден
